އަމީނީ މަގުގުގެ ތިންވަނަ ސެގްމެންޓު ހުޅުވަން ތައްޔާރުވަނީ

އަމީނީ މަގުގެ މަރާމާތުގެ މަސައްކަތުގެ ތެރެއިން މިހާރު މަސައްކަތް ކުރަމުންްދާ އެ މަގުގެ ތިންވަނަ ސެގްމެންޓު ވަރަށް އަވަށް ހުޅުވޭނެކަމަށް އެ މަސައްކަތްކުރާ އެމްޓީސީސީއިން ބުނެފިއެވެ.

އެ ކުންފުނިން ސޯޝަލް މީޑިއާގައިކުރި ޕޯސްޓެއްގައި ބުނެފައިވަނީ އަމީނީ މަގުގައި މިހާރު ކުރަމުންދަނީ މަގު ހުޅުވުމުގެ ކުރިން ކުރަންޖެހޭ އެންމެ ފަހުގެ މަސައްކަތްތަށްކަމަށެވެ.

އެގޮތުން މަގުގެ ނިޝާންތައް ކުރަހައި ނިމެމުންދާއިރު، ޖަންކްޝަން ބޮކްސް ތަކުގެ ކޮންކްރީޓް މަސައްކަތްތައް ވެސް ނިމެމުން އަންނަކަމަށް އެ ކުންފުނިން ބުންޏެވެ.

ތާރު އަޅައިގެން ހަދާފައިވާ އަމީނީމަގުގެ ބައެއް ސަރަހައްދުތަކުގައި ތާރުގަނޑު އުފުލި، އެ މަގުގައި ބޮޑެތި އަޑިގުޑަންތައް ހެދިފައި އޮތުމުން އެ ތާރުގަނޑު އެއްކޮށް ނަގައި، އެތަން އަލުން ހެދުމުގެ މަސައްކަތް އެމްޓީސީސީއާ ހަވާލުކުރީ މިދިޔަ ޖޫން މަހުއެވެ. 

ދިވެހިރާއްޖޭގެ އަޑުގެ އިމާރާތުން ފެށިގެން ދަރުމަވަންތަ ހޮސްޕިޓަލާ ހިސާބަށް މަގުގެ މަރާމާތު ކުރުމަށްފަހު މިހާރު ވަނީ ހުޅުވާލާއިފައެވެ.  

ތިންވަނަ ސެގްމެންޓުގައި މަރާމާތު ކުރަން ހަމަޖެހިފައިވަނީ ކުރީގެ ހައުސިން މިނިސްޓްރީން ފަށައިގެން މާފަންނު ސްޓޭޑިއަމާ ހަމައަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އާރްޑީސީއާ ހަވާލުކޮށްގެން އަމީނީމަގު ޒަމާނީ ފެންވަރަށް ހެދުމުގެ މަސައްކަތް ފެށީ ޖުލައި 2022 ގައެވެ. އަދި ފިޔަވަހިތަކަކަށް ބަހާލައިގެން ކުރިއަށް ގެންދިޔަ އެ މަޝްރޫއު، އެ ވެރިކަން ނިމުނުއިރު ފުރިހަމަނުވެ އޮތް ސަރަހައްދުގެ އެންމެ ފަހު ބައި ހަދައި ހުޅުވީ 2024 ވަނަ އަހަރުގައެވެ. 

އަމީނީ މަގުގެ ތާރުގަނޑު އެހާ އަވަހަށް ހަލާކުވުމުން އެކަމަށް ފާޑުކިޔަމުން ގެންދާތީ އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބު މަޖިލީހުގައި ވާހަކަދައްކަވަމުން ވިދާޅުވީ އެ މަގު އެހާއަވަހަށް ހަލާކުވީ އެ މަސައްކަތް ކުރުމަށް މިދިޔަ ސަރުކާރުން ހަވާލުކުރި އާރުޑީސީއަކީ މަގުހެދުމަށް އެންމެ ގާބިލުކުންފުންޏަކަށް އޭރުނުވާތީކަމަށެވެ.

އާންމުންނަށް އެ މަގު ނުނުމި ދިގުލައިގެން ދިތީ އެކަމުގެ ދަތިތައް ކުރިމަތިވަމުން ދިއުމުގެ ސަބަބުން މި ސަރުކާރުން ވެރިކަމާ ހަވާލުވެ އާރުޑީސީއިން މަސައްކަތް ކުރަމުން އައިގޮތަށް މަސައްކަތް ކުރުމަށް ދޫކޮށްލީކަމަށް ވެސް މިނިސްޓަރު ވިދާޅުވިއެވެ

އެ ކުންފުނީގައި އެ މަސައްކަތް ކުރާނެ މެޝިނަރީ ނެތްއިރު އެ މަސައްކަތް އެ ކުންފުނިން ކުރީ އިންޑިއާއިން މެނުއުލް އާދައިގެ ތާރު އެޅުމަށް ބޭނުންކުރާ މޭޝިނެއް ބޭނުންކޮށްގެންކަމަށް ވެސް މިނިސްޓަރު ވިދާޅުވިއެވެ.