ރާއްޖެގައި ދިރިއުޅޭ 2 ލައްކައަށްވުރެ ގިނަ ބިދޭސީން މިހާރު ވަނީ ވެރިފައި ކުރެވިފައި: މިނިސްޓަރު އިހުސާން

ދިވެހިރާއްޖޭގައި ދިރިއުޅޭ 263000 (ދެ ލައްކަ ފަސްދޮޅަސް ތިންހާސް) ބިދޭސީން މިހާރު ވަނީ 100 އިންސައްތަ ޔަގީންކޮށް ވެރިފައި ކުރެވިފައި ކަމަށް ހޯމް މިނިސްޓަރު އަލީ އިހުސާން ވިދާޅުވެެއްޖެ އެވެ.

ރޭ ބޭއްވި އަހާ ފޯރަމްގައި ވާހަކަ ދައްކަވަމުން މިނިސްޓަރު އިހުސާން ވިދާޅުވީ ކުރަނގި އޮޕަރޭޝަންގެ ތެރެއިން ވެރިފައިކުރެވިފައިވާ ބިދޭސީންގެ 95 އިންސައްތަ މީހުންގެ ބަޔޯމެޓްރިކްސް މިހާރު ނަގާ ނިމިފައިވާ ކަމަށެވެ. އަދި ބާކީ އޮތް ހަތަރު އިންސައްތަ ބިދޭސީން މިވަގުތު ރާއްޖޭގައި ނެތް ކަމަށާއި ބާކީ ބަޔޯމެޓްރިކްސް ނަގަން ޖެހިފައިވަނީ ހަމައެކަނި އެންމެ އިންސައްތައިގެ ބިދޭސީންގެ ތެރެއިން ކަމަށް މިނިސްޓަރު އިހުސާން ވިދާޅުވި އެވެ.

މިނިސްޓަރު އިހުސާން ވިދާޅުވީ މިފަދަ ބޮޑު ކާމިޔާބީއެއް ހާސިލުވެފައިވަނީ އިމިގްރޭޝަން، ފޮރިން ލޭބަރ ޑިޕާޓްމެންޓް އަދި ރަަށްރަށުގެ ކައުންސިލްތަކުގެ ފުރިހަމަ އެހީތެރިކަމާ އެކު ކަމަށެވެ.

އޮޕަރޭޝަން ކުރަނގީގެ ދެވަނަ ފިޔަވަހީގެ މަސައްކަތަށް އަލިއަޅުއްވާލައި މިނިސްޓަރު އިހުސާން ވިދާޅުވީ މި ފިޔަވަހީގައި ކުރިއަށްދާ މަސައްކަތްތަކަކީ ވިސާ ފީ ނުދައްކާ އަދި ވިސާ ފީ ދައްކައިގެންވެސް އެ މީހުން ކުރަންޖެހޭ މަސައްކަތް ނޫން އެހެން މަސައްކަތް ކުރަމުންދާ ބިދޭސީން ހޯދައި އެމީހުން ހައްޔަރުކުރުމުގެ މަސައްކަތް ކަަމަށެވެ. މިގޮތުން އއ.ތޮއްޑޫގައި ހިންގި އޮޮޕަރޭޝަންގައި 500 އަށްވުރެ ގިނަ ބިދޭސީންނާ ސުވާލުކޮށް 107 މީހުން ހައްޔަރުކުރުމަށް ނަގާފައިވާ ކަމަށާއި އެ މީހުން ޕައިޕްލައިންގެ ތެރެއިން ޑިޕޯޓުކުރުމުގެ މަސައްކަތް މިިހާރު ކުރަމުންދާ ކަމަށް މިނިސްޓަރު އިހުސާން ވިދާޅުވި އެވެ.

މިނިސްޓަރު އިހުސާން ވިދާޅުވީ ކުރިއަށް އޮތް ދުވަސްތަކުގައި ބިދޭސީ އާބަދީ ގިނަ ހުރިހާ ހިސާބެއްގައި މިފަދަ އޮޕަރޭޝަންތައް ކުރިއަށް ގެންގޮސް ގަވާއިދާ ހިލާފަށް އުޅެމުންދާ ބިދޭސީންނަށް އެދެވޭ ފިޔަވަޅުތައް އަޅަމުންދާނެ ކަމަށެވެ.

މިފަދަ މައްސަލަތަކުގައި ބިދޭސީންނަށް ފިޔަވަޅު އެޅުމުގެ އިތުރަށް ބިދޭސީ މަަަސައްކަތްތެރިންނަށް މުސާރަ ނުދީ އެމީހުން ލައްވައި އެހެން މަސައްކަތްތައް ކުރާ ދިވެހި އިހުމާލުވެރިންނަށް ވެސް ފިޔަވަޅު އަޅާނެ ކަމަށް މިނިސްޓަރު އިތުރަށް ވިދާޅުވި އެވެ. މިގޮތުން އެފަދަ އަމަލެއް ކުރާ ދިވެއްސަކު މަދުވެގެން 50،000 ރުފިޔާއިން ޖޫރިމަނާ ކުރެވިގެންދާނެ ކަމަށް މިނިސްޓަރު އިހުސާން ވިދާޅުވި އެވެ.

ކުރިއަށް އޮތް 2027 ވަނަ އަހަރުގެ މެއި މަހުގެ ކުރިން މި އޮޕަރޭޝަން ނިންމުމަށް އަމާޒުކޮށްފައިވާކަމަށް ފާހަގަކޮށް މިނިސްޓަރު އިހުސާން ވިދާޅުވީ ސަރުކާރުގެ އަމާޒަކީ މި އޮޕަރޭޝަން ނިމިގެންދާއިރު ރާއްޖޭގައި ދިރިއުޅޭ ބިދޭސީންގެ އާބާދީގެ މައްސަލައަކީ ދުނިޔޭގެ އެހެން ގައުމުތަކުގައިވެސް ބަަލައިގަންނަ މިންގަނޑަކަށް ހައްލުކުރެވިފައިވާ މަައްސަލައަކަށް ވެގެންދިއުން ކަމަށެވެ.

އޮޕަރޭޝަން ކުރަނގި އަކީ ރާއްޖޭގައި ގަވާއިދާ ހިލާފަށް ދިރިއުޅޭ ބިދޭސީން ހޯދައި އެމީހުންނަށް އެދެވޭ ފިޔަަވަޅުތައް އެޅުމުގެ މަގްސަދުގައި 2024 ވަަނަ އަހަރު ހޯމް މިނިސްޓްރީ އާއި، އިމިގްރޭޝަން އަދި ދިވެހި ފުލުހުން ގުޅިގެން ކުރިއަށް ގެންދާ އޮޕަރޭޝަންއެކެވެ. މި އޮޕަރޭޝަންގެ ތެެރެއިން މާލެ ސަރަހައްދުގެ އިތުރަށް ރާއްޖޭގެ އެކި ރަށްރަށުގައި ދިރިއުޅޭ ބިދޭސީން ބަލައި ފާސްކޮށް އެ މީހުންގެ ބަޔޯމެޓްރިކްސް ނެގުމުގެ މަސައްކަތް މިހާރުވެސް ކުރިއަށްދާ ކަމަށް އެ މުއައްސަސާތަކުން ވަނީ ބުނެފަ އެވެ.