އައިޕީޔޫގެ 153 ވަަނަ އެސެމްބްލީގައި ބައިވެރިވަޑައިގަތުމަށް މަޖިލީހުގެ ރައީސް ފުރާވަޑައިގެންފި

ޓެންޒެނޭނިއާގައި ބޭއްވުމަށް ހަަމަޖެހިފައިވާ އިންޓަރ_ޕާލަމެންޓްރީ ޔޫނިއަން (އައިޕީޔޫ) ގެ 153 ވަަނަ އެސެމްބްލީގައި ބައިވެރިވަޑައިގަތުމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ފުރާވަޑައިގެންފި އެވެ.

މަޖިލީހުގެ އިދާރާއިން މިއަދު ނެރެފައިވާ ނޫސްބަޔާނުގައި ބުނެފައިވާ ގޮތުގައި އައިޕީޔޫގެ އެސެންބްލީ ބޭއްވުމަށް ހަަމަޖެހިފައިވަނީ މި ހިނގަމުންދާ އޮކްޓޯބަރު މަހުގެ 5 ވަަނަ ދުވަހުން 9 ވަނަ ދުވަހަށް ކަަމަށެވެ.

އެ އިދާރާއިން ބުނެފައިވާ ގޮތުގައި މި އަހަރުގެ އެެސެމްބްލީގެ އާންމު ބަހުސްގައި މަޖިލީހުގެ ރައީސް ބަހުސް ކުރަށްވާނެ ކަމަށެވެ. އަދި މި އަހަރުގެ ބަހުސް ބޭއްވުމަށް ހަަމަޖެހިފައިވަނީ "ހުރިހާ ފަރާތްތަކެއް ބައިވެރިކުރުމާއި، އިތުބާރާއި، ފުރުސަތުތައް ފަހިކޮށްދިނުމުގެ ތެރެއިން ހެޔޮވެރިކަން ކުރިއަރުވައި މުޖުތަމައުތައް ބާރުވެރިކުރުވުން" މި މައުޟޫއުގެ ދަށުން ކަމަށް މަޖިލީހުގެ އިދާރާއިން ވަނީ ބުނެފަ އެވެ.

މަޖިލީހުގެ އިދާރާއިން މައުލޫމާތު ދީފައިވާ ގޮތުގައި މަޖިލިސް ރައީސްގެ އަރިހުގައި މި ދަތުރުފުޅުގައި ބައިވެރިވެވަޑައިގަންނަވާ ވަފުދުގައި، ހުޅުދޫ ދާއިރާގެ މެންބަރު މުޙައްމަދު ޝާހިދު، ބާރަށު ދާއިރާގެ މެންބަރު އިބްރާހީމް ޝުޖާއު، މާފަންނު މެދު ދާއިރާގެ މެންބަރު އަސްމާ ރަޝީދު، ހުރާ ދާއިރާގެ މެންބަރު ޑރ. އަނާރާ ނައީމް، ނިލަންދޫ ދާއިރާގެ މެންބަރު ފާތިމަތު ސައުދާ، ގައްދޫ ދާއިރާގެ މެންބަރު މުޙައްމަދު އަލީ އަދި ތޮއްޑޫ ދާއިރާގެ މެންބަރު ޙުސައިން ސަމީރު ހިމެނިވަޑައިގަންނަވާ ކަަމަށެވެ.

މީގެ އިތުރުން، ކައުންސެލް ޖެނެރަލް އަލްއުސްތާޛާ ފާތިމަތު ފިލްޒާ އާއި، ޗީފް އޮފް ބިއުރޯ އަހުމަދު ނިހާން ހުސައިން މަނިކުގެ އިތުރުން ފޮރިން ރިލޭޝަންސް ޑިޕާޓްމަންޓުގެ އެސިސްޓަންޓް ޑިރެކްޓަރ ޖެނެރަލް ޒުއްޔިނާ ބަދްރީ މި ވަފުދުގައި ހިމެނިވަޑައިގަންނަވާ ކަމަށް މަޖިލީހުގެ އިދާރާއިން ބުނެފައިވެ އެވެ.