މުލިހިތައް ހުރި އަމީނީމަގުގެ ދެ ސެގުމެންޓު މަރާމާތަށްފަހު އާދިއްތަ ދުވަހު ހުޅުވާލަނީ

މާލޭ އަމީނީ މަގުގެ މަރާމާތުގެ މަސައްކަތް ނިންމި ސަރަހައްދު އާދިއްތަ ދުވަހު ހުޅުވާލާނެ ކަމަށް ހައުސިން މިނިސްޓްރީން ބުނެފި އެވެ.

އަމީނީ މަގު މަރާމާތު ކުރުމަށް ކުރިއަށް ގެންދާ މަޝްރޫއުގެ ތެރެއިން އެ މަގުގެ ދެވަނަ ސެގްމެންޓުގައި ތާރުއެޅުމުގެ މަސައްކަތް އެމްޓީސީސީން މިހާރު ވަނީ ނިންމާލާފަ އެވެ.

ދެވަނަ ސެގްމެންޓުގައި ހިމެނެނީ އިއްޒުއްދީން މަގުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށެވެ. މި ސަރަހައްދުގައި ކުރިން އަޅާފައިވާ ތާރުގަނޑު ނަގައި ސަބްގްރޭޑް އަދި އޭބީސީ ފަށަލައިގެ މަސައްކަތް ނިންމައި އަލުން ދެ ފަށަލައަކަށް ތާރު އެޅުމުގެ މަސައްކަތް ކޮށްފައިވެ އެވެ.

ތާރު އެޅުމުގެ މަސައްކަތް އެއްކޮށް ނިންމައި މިވަގުތު ކުރިއަށް ދަނީ ޓްރެފިކް ނިޝާންތައް ކުރެހުމާ، ފިނިޝިން މަސައްކަތެވެ.

ހައުސިން މިނިސްޓްރީން ބުނީ ފިނިޝިންގެ ހުރިހާ މަސައްކަތެއް ނިންމައި، އާދިއްތަ ދުވަހު އާންމު ދަތުރުފަތުރަށް ހުޅުވާލާނެ ކަމަށެވެ.

ދެވަނަ ސެގްމެންޓަށް ފަހު ތިން ވަނަ ސެގްމެންޓުގެ ގޮތުގައި ކުރިއަށް ގެންދާނީ އިއްޒުއްދީން މަގާ ހަމައިން ފަށައިގެން ކޯރުކެނޑި ހިނގުމާ ހަމައަށް އޮންނަ ސަރަހައްދެވެ.