ތަރައްޤީވެފައިވާ ޤައުމަކަށް ރާއްޖެ ހެދުމުގައި ޒުވާނުންގެ ދައުރު ބޮޑު ކަމަށް ނައިބު ރައީސް ވިދާޅުވެއްޖެ

ތަރައްޤީވެފައިވާ ޤައުމަކަށް ދިވެހި ރާއްޖެ ހެދުމަށްޓަކައި ޒުވާނުން އިސްނަގަން ޖެހޭ ކަމަށާއި، އެކަމައި ޒުވާނުން ބައިވެރިވާާން ޖެހޭ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް ވިދާޅުވެއްޖެ އެވެ.

ވިލާ ކޮލެޖުގެ ސްޓޫޑެންޓް އެޗީވްމަންޓްސް އެވޯޑު ދިނުމަށް ބޭއްވި ރަސްމިއްޔާތުގައި ހޮނިހިރު ދުވަހުގެ ރޭ ވާހަކަ ދައްކަވަމުން ނައިބު ރައީސް ވިދާޅުވީ، ދަސްވެނިވި ދަރިވަރުން ހާސިލުކޮށްފައިވާ އިލްމާއި، އެ ދަރިވަރުން ހޯދާފައިވާ ހުނަރު ބޭނުންކޮށްގެން ދިވެހި ޤައުމަށް ޚިދުމަތް ކުރުމަކީ މުހިންމު ކަމެއް ކަމަށެވެ. ޚާއްސަކޮށް ޤައުމަށް އެންމެ ބޭނުންތެރި ދާއިރާތަކުން ޙައްލު ހޯދައިދީ، އައު ވިސްނުންތައް އިސްކުރަން ޖެހޭ ކަމަށް ނައިބު ރައީސް ވިދާޅުވި އެވެ.

ރާއްޖެ އަށް ދިމާވެފައިވާ ކަންކަމުގައި ޙައްލު ހޯދުމަށް މިހާރު އިސްކުރަން ޖެހެނީ ދަރިވަރުންގެ ވިސްނުން ކަމަށް ފާހަގަކުރައްވައި ނައިބު ރައީސް ވިދާޅުވީ، ދަރިވަރުން އެ މަގުން މަސައްކަތް ކުރާނެ ކަމުގެ ޔަޤީންކަން ވެސް އޮންނެވި ކަމަށެވެ.

މީގެ އިތުރުން ތަރައްޤީވެފައިވާ ޤައުމަކަށް ދިވެހިރާއްޖެ ހެދުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ގެންގުޅުއްވާ ތަސައްވުރާާއި، ވިސްނުންފުޅު ވެސް ނައިބު ރައީސް ވަނީ ފާހަގަކުރައްވައިފަ އެވެ. އެގޮތުން ރައީސް މުޢިއްޒުގެ ތަސައްވުރަކީ 2040 ވަނަ އަހަރާ ހަމައަށްދާއިރު ރާއްޖެ އަކީ ފުރިހަމަ އަށް ތަރައްޤީވެފައިވާ ޤައުމަކަށް ހެދުމުގެ ތަސައްވަރު ކަމަށް ނައިބު ރައީސް ވިދާޅުވި އެވެ. އެކަން ހާސިލުކުރުމުގައި އެންމެންގެ ބައިވެރިވުން ބޭނުންވާ ކަމަށާއި، ޚާއްސަކޮށް ޒުވާނުންގެ ބައިވެރިވުން ބޭނުންވާ ކަމަށް ނައިބު ރައީސް ވިދާޅުވި އެވެ.

ނައިބު ރައީސް ޙުސެއިން ވަނީ ގިނަ އަދަދެއްގެ ދަރިވަރުން ދަސްވެނިވެގެންދާ މަންޒަރު ފެނުމަކީ މުޅި ޤައުމުގައި ހުރި މައްސަލަތައް ޙައްލުކުރުމަށް އޮތް އަހަންމިއްޔަތުކަން ކަމަށް ފާހަގަކުރައްވައިފަ އެވެ.