ސަރުކާރުން ތަރައްޤީކުރާ 10 ރިސޯޓަކީ ފަތުރުވެރިކަމަށް އިންޤިލާބެއް: އަފީފް

ރާއްޖޭގެ ރައްޔިތުންނަށް ޑޮލަރުން އާމްދަނީ ލިބޭ ގޮތަށް ސަރުކާރުން ތަރައްޤީ ކުރުމަށް ނިންމާފައިވާ 10 ރިސޯޓަކީ، ރާއްޖޭގެ ފަތުރުވެރިކަމަށް އަންނާނެ ބޮޑު އިންޤިލާބެއް ކަމަށް ފަތުރުވެރިކަމުގެ ދާއިރާގެ ތަޖުރިބާކާރެއް ކަމަށްވާ ކްރައުން ކުންފުނީގެ ޗެއާޕާސަން ޙުސެއިން އަފީފް (ޗަމްޕާ އަފީފް) ވިދާޅުވެއްޖެ އެވެ.

މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ޗެއާޕާސަންގެ މަޤާމު ވެސް އަދާކުރައްވަމުން އަންނަ އަފީފް މިހެން ވިދާޅުވެފައި ވަނީ، ޤައުމީ ފަތުރުވެރިކަމުގެ ދުވަސް ފާހަގަ ކުރުމަށް ބޭއްވި ޖަލްސާގައި ވާހަކަ ދައްކަވަމުންނެވެ.

އަފީފް ވިދާޅުވެފައި ވަނީ، ރައްޔިތުން ހިއްސާވާ ގޮތަށް ސަރުކާރުން ހިންގަން ނިންމާފައިވާ އެ މަޝްރޫއަކީ ވަރަށް ރަނގަޅު މަޝްރޫއެއް ކަމަށެވެ. އެ މަޝްރޫއަކީ ވަރަށް އުންމީދީ އަދި ކާމިޔާބުވާނެ ކަމުގެ ޔަޤީންކަން އޮތް މަޝްރޫއެއް ކަމަށް ވެސް އަފީފް ވިދާޅުވި އެވެ. ފަތުރުވެރިކަމުގެ ދާއިރާގައި ގިނަ ޚިދުމަތްތަކެއް ކުރައްވާފައިވާ، އަދި އެ ދާއިރާގެ ގިނަ ތަޖުރިބާތަކެއް ހުންނެވި އަފީފް ވަނީ އެ މަސައްކަތުގައި ބައިވެރިވެވަޑައިގަންނަވަން ބޭނުންވާ ކަމަށް ވެސް ވިދާޅުވެފައި އެވެ.

2026 ވަނަ އަހަރަށް ރައްޔިތުންގެ މަޖިލިސް ހުޅުވަން ބޭއްވި ޖަލްސާގައި އިއްވެބި ރިޔާސީ ބަޔާނުގައި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވަނީ، ސަރުކާރުން ކުންފުންޏެއް މެދުވެރިކޮށް 10 ރިސޯޓު ތަރައްޤީކުރުމަށް ނިންމާފައިވާ ކަމަށް ހާމަކުރައްވައިފަ އެވެ. އެ ރިސޯޓުތަކުގެ ހިއްސާދާރުންނަކީ ދިވެހި ރައްޔިތުންކަމަށާއި، އެ ރިސޯޓުތަކުން ލިބޭ ފައިދާގެ ގޮތުގައި ކޮންމެ ދިވެހި ރައްޔިތަކަށް އަހަރަކު 400 ޑޮލަރު ލިބޭނެ ކަމަށް ވެސް ރައީސް މުޢިއްޒު ވަނީ ވިދާޅުވެފައި އެވެ.

އެ މަޝްރޫއާ ގުޅޭ ގޮތުން އިތުރަށް ވާހަކަ ދައްކަވަމުން އަފީފް ވިދާޅުވެފައި ވަނީ، ރާއްޖޭގެ ފަތުރިވެރިކަން ދެކެމުން މި އަންނަ ކާމިޔާބީތަކުގެ އަސްލަކީ ސަރުކާރާއި އަމިއްލަ ފަރާތްތަކުން ފާއިތުވި އަހަރުތަކުގައި ކުރި މަސައްކަތް ކަމަށެވެ. އެހެންކަމުން ކުރިއަށް އޮތް ތަނުގައި ވެސް މި ސިނާއަތް ކުރިއަރައިގެން ދާނީ ބަދަހި ގުޅުމުން ކަަމަށާއި، މާޒީ އިން ލިބުނު ފިލާވަޅުތަކުން ކުރިއަށް ދާން ޖެހޭ ކަމަށް އަފީފް ވިދާޅުވެފައިވެ އެވެ.