29 އަހަރު ފަހުން ކިރިގިސްތާނުން ރާއްޖެ ބަލި ކޮށްފި

ބައިނަލްއަގުވާމީ އެކުވެރިކަމުގެ ފުޓްބޯޅަ މެޗެއްގައި ކިރްގިސްތާނުން އަމިއްލަ ގައުމުގައި ކުޅެ 5-0 ގެ ތަފާތު ބޮޑު ނަތީޖާއަކުން ރާއްޖެ ބަލިކޮށްފިއެވެ.

މިއީ 29 އަހަރަށްފަހު ކިރްގިސްތާނުން ރާއްޖޭގެ މައްޗަށް ހޯދި ފުރަތަމަ މޮޅެވެ. މި ދެ ޓީމު 12 އަހަރަށް ފަހު އިއްޔެ ބައްދަލުކުރި މެޗުގައި ކިރްގިސްތާނުން ޖެހި ހުރިހާ ލަނޑެއްވެސް ކާމިޔާބުކުރީ މެޗުގެ ފުރަތަމަ ހާފުގައެވެ.

ކިރިގިސްތާންގެ ގޯލުތައް ޖަހައިދިނީ އަޓަބައޭވް އެރްބޯލް، އަސްތަނަކުލޯވް ޝިރޯޒުދީން، މުރްޒަކޯވް ވަލެރީ އަދި ޖޮއެލް ކޯޖޯ އެވެ. އަޓަބައޭވް އެރްބޯލް ވަނީ ދެ ލަނޑު ޖަހައިފަ އެވެ. ކިރްގިސްތާންގެ ގޯލުތައް ވަނީ ރާއްޖޭގެ ޑިފެންސަށް މެޗުގެ ކުރީކޮޅު ހެދުނު ގޯސްތަކުގެ ފައިދާ ނަގައިގެންނެވެ.

ދެވަނަ ހާފަށް ރާއްޖޭން ވަނީ އަލީ ފާސިރު (ސެންޓޭ)، އިބްރާހިމް މަހުދީ ހުސެއިން (ފޭދޫ އިއްބެ)، އަހުމަދު މާއިޝް ރަޝީދު (މާއި) އަދި ހުސެއިން ޝިފާއު ޔޫސުފް (ކުރޯ) ކުޅެން ނެރެ ކުޅުން ރަނގަޅު ކޮށްފަ އެވެ. ސެންޓޭ ފޮނުވާލި ނުރައްކާތެރި ހަމަލާއެއް އަރިމަތީ ދާގަނޑަށް އަމާޒުވިއިރު، އިތުރު ގޯލެއް ވަނަނުދީ ދެވަނަ ހާފު ހިފަހައްޓާލިއެވެ.

މީގެ އިތުރުން މެޗުގެ ފަހު ވަގުތު އަރީން އަބްދުﷲ އިބްރާހީމް ވެސް ވަނީ ކުޅެން ނެރެފަ އެވެ. މިއީ އޭނާ ގައުމީ ޓީމަށް ކުޅެދިން ފުރަތަމަ މެޗެވެ.

މިއީ ކިރިގިސްތާނާއި ދިވެހި ރާއްޖެ ބައްދަލުކުރި ފަސްވަނަ މެޗެވެ. އެންމެ ފުރަތަމަ ދެ ޓީމު ބައްދަލުކުރީ 1997 ވަނަ އަހަރެވެ. ވޯލްޑް ކަޕް ކޮލިފައިންގައި އެންމެ ފުރަތަމަ ރާއްޖެ 3-0 އިން ބަލި ވި އިރު ދެވަނަ މެޗުގައި ވަނީ 6-0 އިން ބަލިވެފަ އެވެ. އެއަށް ފަހު 2011 ގައި އޭއެފްސީ ޗެލެންޖް ކަޕް ކޮލިފައިންގައި 2-1 އިން ރާއްޖެ މޮޅުވި އިރު، 2014 ގެ އޭއެފްސީ ޗެލެންޖް ކަޕްގައި ރާއްޖެ ވަނީ 2-0 އިން ކުރި ހޯދައިފަ އެވެ.

ރާއްޖޭގެ ގައުމީ ޓީމަށް މި އިންޓަނޭޝަނަލް ބްރޭކުގައި ދެން އޮތީ އަންނަ ބުރާސްފަތި ދުވަހު ލުބުނާނާ ދެކޮޅަށް ކުޅޭ މެޗެވެ.