ބަންޑާރަ ނައިބު ހަނދާން ކޮށްދެއްވީ، ރިސޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކުރީ ޔާމީންގެ ވެރިކަމުގައިކަން!

ރިސޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައި ވަނީ، ކުރީގެ ރައީސް ޢަބްދުﷲ ޔާމީންގެ ވެރިކަމުގައި ކަމަށް ވިދާޅުވެ، ބަންޑާރަ ނައިބު އަޙުމަދު އުޝާމްގެ ވަރުގަދަ ރައްދެއް ދެއްވައިފި އެވެ.

ބަންޑާރަ ނައިބު އުޝާމް އާއި، ހައުސިން މިނިސްޓަރު ޑޮކްޓަރު ޢަބްދުﷲ މުއްޠަލިބަށް އަމާޒުކުރައްވައި ޔާމީން ދެއްކެވި ވާހަކަ އަކަށް ރައްދު ދެއްވައި އުޝާމް ވިދާޅުވީ، ޔާމީން މިއަދު ހަނދުމަފުޅު ނެތީ ކަމަށް ވެދާނެ ކަމަށެވެ. އެހެން ނަމަވެސް ރިސޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލު ކޮށްފައިވަނީ ރައީސް ޔާމީންގެ ވެރިކަމުގައި ކަމަށް އުޝާމް ފާހަގަ ކުރެއްވި އެވެ.

އުޝާމް ވިދާޅުވީ ދިވެހިރާއްޖޭގައި އެންމެ ފުރަތަމަ ޓޫރިޒަމްއާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރު ކަމަށެވެ. އޭރު ޤާނޫނުގެ ދަށުން ޓޫރިސްޓު ރިސޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަކަށް ކަމަށް އުޝާމް ފާހަގަ ކުރެއްވި އެވެ. ޤާނޫނަށް ގެނެވުނު އިސްލާހަކުން އެ މުއްދަތު 50 އަހަރަށް އިތުރުކޮށްފައިވަނީ 2010 ވަނަ އަހަރު، ކުރީގެ ރައީސް މުޙައްމަދު ނަޝީދުގެ ވެރިކަމުގައި ކަމަށް އުޝާމް ވިދާޅުވި އެވެ.

އަދި އެއަށްފަހު އެ މުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށް އުޝާމް ވިދާޅުވެފައިވެ އެވެ. މީގެ އިތުރުން ޓޫރިޒަމްއާ ބެހޭ ޤާނޫނުގެ އަށް ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓު ރިސޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެރަށެއްގައި ކޮށްފައިވާ އިންވެސްޓްމަންޓެއްގެ އަގުން ބަލަށް ކެނޑުމަށްފަހު ޖެހޭ އަގު އިންވެސްޓުކޮށްފައިވާ ފަރާތަށް ސަރުކާރުން ދައްކަންޖެހޭ. ކަމަށް އުޝާމްގެ ޕޯސްޓުގައި ފާހަގަ ކުރައްވާފައިވެ އެވެ.

އެހެން ނަމަވެސް، މިއާ ޚިލާފަށް ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓު ޤާނޫނުގެ ދަށުން ކަމަށް ބަންޑާރަ ނައިބު ވިދާޅުވި އެވެ. މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަަމައެކަނި ލެޓަރ އޮފް އިންޓެންޓް (ކޮމާޝަލް ޓާމްސް އެގްރީމެންޓް) އެއްގައި ކަމަށާއި، މަޝްރޫއު ފެށުމުގެ ކުރިން މި އެއްބަސްވުމުގެ ޓާމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެއްބަސްވުމެއްގައި ސޮއިކުރުމުގެ އިތުރުން، މިކަމާ ގުޅުންހުރި ޤާނޫނުތައް މަޖިލީހުން ފާސްކުރަންޖެހޭނެ ކަމަށް އުޝާމް ވިދާޅުވި އެވެ.

ޕޯސްޓު ނިންމާލައްވަމުން ބަންޑާރަ ނައިބު އުޝާމް ވަނީ އެ މަޝްރޫއު ކުރިއަށް ގެންދިޔުމުގައި ދިވެހިރާއްޖޭގެ ޤާނޫނު އަސާސީ އާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަޤީންކަން ދެއްވައިފަ އެވެ.