ހަތް އަހަރަށް ފަހު އެފްއޭއެމް އެވޯޑްސް މި މަހު 8 ގައި، ފުޓްސަލް ވެސް ހިމެނޭ

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބާއްވާ "އެފްއޭއެމް އެވޯޑްސް 2026" މި އޮކްޓޫބަރު މަހުގެ 8 ވަނަ ދުވަހުގެ ރޭ ބޭއްވުމަށް ހަމަޖެހިއްޖެ އެވެ.

މި އެވޯޑް ހަފްލާއަކީ ނިމިދިޔަ ސީޒަނުގައި ރާއްޖޭގެ ފުޓްބޯޅައާއި ފުޓްސަލްގެ ދާއިރާއިން އެކިއެކި ގޮތްގޮތުން ފާހަގަކުރެވުނު ކުޅުންތެރިންނާއި، ކޯޗުން އަދި ޓީމުތަކުގެ ކާމިޔާބީތައް ފާހަގަކޮށް، އެ ފަރާތްތަކުގެ އަގުވަޒަންކުރުމުގެ ގޮތުން ބާއްވާ ހާއްސަ އެވޯޑް ހަފްލާއެކެވެ.

މި އެވޯޑް ނައިޓްގައި ދިނުމަށް ހަމަޖެހިފައިވާ މުހިންމު އެވޯޑްތަކުގެ ތެރޭގައި އެންމެ މޮޅު ފުޓްބޯޅަ ކުޅުންތެރިޔާ (ފިރިހެން އަދި އަންހެން)، އެންމެ މޮޅު ފުޓްސަލް ކުޅުންތެރިޔާ، އެންމެ މޮޅު ބިދޭސީ ކުޅުންތެރިޔާ، އެންމެ އުންމީދީ ކުޅުންތެރިޔާ، އެންމެ މޮޅު ގޯލްކީޕަރު، އެންމެ ގިނަ ލަނޑު ޖެހި ކުޅުންތެރިޔާ، އެންމެ މޮޅު ކޯޗު، އެންމެ މޮޅު ރެފްރީ، އެންމެ މޮޅު ކްލަބް، އެންމެ މޮޅު ރީޖަނަލް ކްލަބް އަދި ސަޕޯޓަރުންގެ މެދުގައި އެންމެ މަގުބޫލު ކުޅުންތެރިޔާގެ އެވޯޑު ހިމެނެއެވެ.

އެފްއޭއެމްގެ އަމާޒަކީ މިފަދަ އެވޯޑެއް މެދުވެރިކޮށް ދިވެހި ފުޓްބޯޅަ އާއި ފުޓްސަލްގެ ފެންވަރު މަތިކޮށް، ކުޅުންތެރިންގެ މެދުގައި ވާދަވެރިކަމާއި ހިތްވަރު އާކުރުމެވެ. މީގެ އިތުރުން ކުޅިވަރުގެ ދާއިރާގައި ހަރަކާތްތެރިވާ ފަރާތްތަކުގެ މަސައްކަތް ބަލައިގަނެ، އެކަން ފާހަގަކުރުމަކީ ދިވެހި ކުޅިވަރު ކުރިއެރުވުމަށް އެޅޭ މުހިންމު ފިޔަވަޅެކެވެ.

އެންމެ ފުރަތަމަ އެފްއޭއެމް އެވޯޑްސް ބާއްވަން ފެށީ 2004 ވަނަ އަހަރެވެ. މެދުކެނޑުމެއް ނެތި 2011 ވަނަ އަހަރާ ހަމައަށް ކޮންމެ އަހަރަކުވެސް މި އެވޯޑު ހަފްލާ ބޭއްވިއެވެ. ނަމަވެސް މެދުކެނޑުމަކަށް ފަހު ، އަލުން އެވޯޑްސް ބާއްވަން ފެށީ 2016 ވަނަ އަހަރުއެވެ. އެއަށްފަހު 2017 އަދި 2018 ވަނަ އަހަރުވެސް އެވޯޑު ދިނުން ކުރިއަށްގެންދިޔައެވެ.

އޭގެ ފަހުން ހަތް އަހަރުގެ ދިގު މެދުކެނޑުމަކަށްފަހު، މިދިޔަ އަހަރު އެފްއޭއެމްގެ ރައީސް ކަމަށް އައްޔަނުކުރެވުނު އަހުމަދު ތޯރިގު (ޓޮމް) ގެ އިސްނެންގެވުމުގެ ދަށުން، ދިވެހި ފުޓްބޯޅައާއި ފުޓްސަލްގެ ރޫހު އާކޮށް އަގުވަޒަންކުރުމުގެ ގޮތުން އެފްއޭއެމް އެވޯޑްސް އަލުން ކުރިއަށް ގެންދަން ނިންމީ އެވެ.