ތައިލެންޑުގައި ފެންބޮޑުވުމުން ރައީސް ތައުޒިޔާ ވިދާޅުވެއްޖެ

ތައިލެންޑަށް ބޯކޮށް ވާރޭވެހި، ފެންބޮޑުވުމުގެ ހާދިސާގައި ލިބުނު ބޮޑެތި ގެއްލުންތަކާ ގުޅިގެން، އެގައުމުގެ ބޮޑުވަޒީރު އަނުތިން ޗާންވިރަކުލް އަށް، ރައީސް ޑރ. މުހައްމަދު މުއިއްޒު ތައުޒިޔާގެ މެސެޖެއް ފޮނުއްވައިފި އެވެ.

އެމަނިކުފާނުގެ މެސެޖުގައި، ތައިލެންޑުގައި ފެންބޮޑުވުމުގެ ސަބަބުން ގިނަ ބަޔަކު މަރުވެ، އެތައް ބައެއްގެ ގެދޮރުގެއްލި، ބޮޑެތި ގެއްލުންތަކެއް ލިބުމާ ގުޅިގެން އެކަމުގެ ހިތާމައިގައި ބައިވެރިވެވަޑައިގަންނަވާ ކަމަށް ވިދާޅުވެފައިވެ އެވެ.

ރައީސްގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، ތައިލެންޑުގެ ބޮޑުވަޒީރަށާއި ސަރުކާރަށް އަދި އެ ގައުމުގެ ރައްޔިތުންނަށް، ހާއްސަކޮށް ކަރަންޓުގައި ޖެހުމާއި ގެނބުމުގެ ހާދިސާތަކުގައި، ފުރާނަ ގެއްލިދިޔަ ފަރާތްތަކުގެ އާއިލާތަކަށް އިހުލާސްތެރި ތައުޒިޔާ އަރިސްކުރައްވާފައިވެ އެވެ.

މީގެއިތުރުން، މި ހާދިސާގައި އަނިޔާވި ފަރާތްތަކަށް އަވަސް ޝިފާއަކަށް އެދިވަޑައިގެން، މިކާރިސާއިން އަރައިގަތުމަށް ޓަކައި، މިހާރު ކުރިއަށްދާ މަސައްކަތްތައް އެއްވެސް ހުރަހެއްނެތި ކުރިއަށްގޮސް، އެހީތެރިކަން ބޭނުންވާ ފަރާތްތަކަށް އަވަސް ތަސައްލީއެއް ލިބިގެންދާނެ ކަމަށް އުންމީދުކުރައްވާ ކަމަށްވެސް، އެމަނިކުފާނު ވިދާޅުވެފައިވެ އެވެ.