މި ހަފުތާގައި ބައިނަލްއަގުވާމީ ފެންވަރަށް ހުޅުމާލޭ ސިންތެޓިކް ޓްރެކް އަޅަން ފަށާނެ: މިނިސްޓަރު

އަންނަ ބުރާސްފަތި ދުވަހު ހުޅުމާލޭ ސިންތަޓިކް ޓްރެކް ބައިނަލްއަގުވާމީ މިންގަނޑުތަކަށް ފެތޭގޮތަށް އަލުން އެޅުމުގެ މަސައްކަތް ފަށާނެކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެއެވެ.

""އަހާ" ފޯރަމްގައި ކުރެއްވި ސުވާލަކަށް ޖަވާބުދެއްވަމުން މިނިސްޓަރު ރާފިއު ވިދާޅުވީ ހުޅުމާލެ ސިންތަޓިކް ޓްރެކް އޮތީ މަރާމާތުކޮށްގެން ބޭނުންކުރެވޭވަރަށް ވުރެ ހާލުދެރަކޮށްކަމަށެވެ.

ސަރުކާރުން ގަސްދުކުރަނީ އެ ޓްރެކް މަރާމާތުކުރުމުގެ ބަދަލުގައި ބައިނަލްއަގުވާމީ ފެންވަރަށް ފެތޭގޮތަށް އަލުން އެ ޓްރެކް ހެދުމަށްކަމަށް ވެސް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ އެ މިންގަނޑަށް ފެތޭގޮތަށް ޓްރެކް ހެދުމަށްޓަކައި، މިހާރު އޮތް ސިންތެޓިކް ޓްރެކް އެއްކޮށް ނަގަން ޖެހޭކަމަށެވެ. އެތަނުގައި އަޅާނީ ޕޮލިއުރެތޭން (ޕީއީ) މެޓީރިއަލް ބޭނުންކޮށްގެން އެންމެ ޒަމާނީ ފެންވަރަށް ކަމަށެވެ.

އެ ޓްރެކް އެޅުމުގެ މަސައްކަތް ސަރުކާރުން ކުރާކަމަށާއި، މިހާރު އެ ޓްރެކް އެޅުމަށް ބޭނުންވާ ސާމާނަށް އޯޑަރުކޮށްފައިވާއިރު، އަންނަ ބުރާސްފަތި ދުވަހު އެ މަސައްކަތުގެ އަމަލީ މަސައްކަތް ފެށޭނެކަމަށް ވެސް އޭނާ ވިދާޅުވިއެވެ.

މިނިސްޓަރު ވިދާޅުވީ ސަރުކާރުން އުންމީދުކުރަނީ އެ ޓްރެކުގެ މަސައްކަތް އަންނަ އަހުރުގެ ފެބުރުއަރީ މަހުގެ ތެރޭގައި ނިންމައިލުމަށްކަމަށެވެ.