ވިޒިޓް މޯލްޑިވްސް 2027 ރަސްމީކޮށް އިފްތިތާހުކޮށްފި

ވިޒިޓް މޯލްޑިވްސް 2027 ނުވަތަ ރާއްޖެ އަށް ޒިޔާރާތް ކުރާ އަހަރުގެ ކެމްޕެއިން ރަސްމީކޮށް އިފްތިތާހުކޮށްފި އެވެ.

ހޮނިހިރު ދުވަހުގެ ރޭ މި ކެމްޕެއިން ރަސްމީކޮށް އިފްތިތާހުކޮށްދެއްވާފައި ވަނީ، ޓޫރިޒަމް މިނިސްޓަރު މުޙައްމަދު އަމީން އާއި، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ޗެއާޕާސަން އަދި ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙުސައިން ޢަފީފް އެވެ. ކެމްޕެއިން އިފްތިތާހުކޮށްދެއްވުމަށް ފަހު ވާހަކަ ދައްކަވަމުން މިނިސްޓަރު އަމީން ވަނީ، އެ ކެމްޕެއިންގެ މުހިންމުކަމާއި، ކެމްޕެއިންގައި އެންމެން ބައިވެރިވުމަށް ގޮވާލައްވައިފަ އެވެ.

އެ ރަސްމިއްޔާތުގައި ވަނީ އަންނަ އަހަރު ފަތުރުވެރިކަމުގެ ދާއިރާގެ އެވޯޑު ދޭނެ ދާއިރާތައް ވެސް އިއުލާންކޮށްފައި އެވެ. ޖުމުލަ ހަތަރު ދާއިރާ އަކުން މި އެވޯޑު ދިނުމަށް ވަނީ ނިންމައިފަ އެވެ. އެގޮތުން އިންސާނީ ވަސީލަތް ބިނާކުރުމުގެ ދާއިރާ އާއި، ދެމެހެއްޓެނިވިކަމާއި، ޒިޔާރަތްކުރާ މީހުންގެ ތަޖުރިބާ އަދި ފަރުދީ ފެންވަރެއްގައި ފާހަގަކޮށްލެވޭ ފަރާތްތައް ވެސް ހިމެނެ އެވެ. މި އެވޯޑުތަކަށް ކުރިމަތިލުމުގެ ފުރުސަތު އަންނަ އަހަރު ހުޅުވާލާނެ އެވެ.

ކުރިއަށް 2027 ވަނަ އަހަރަކީ ވިޒިޓް މޯލްޑިވްސް އަހަރުގެ ގޮތުގައި ފާހަގަ ކުރުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވަނީ ނިންމަވައިފަ އެވެ، އަދި މިއަހަރުގެ ރައްޔިތުންގެ މަޖިލިސް ހުޅުވާން އިއްވެވި ރިޔާސީ ބަޔާނުގައި ރައީސް މުޢިއްޒު ވަނީ އެކަން އިއުލާން ކުރައްވައިފަ އެވެ.