މަސްވެރިންނަށް މިހާތަނަށް 2.3 ބިލިއަން ރުފިޔާ ސަރުކާރުން ދައްކައިފިން: މިނިސްޓަރު ޝިޔާމް

މި ސަރުކާރުގެ ތެރޭގައި މަސްވެރިން މިފްކޯއިން ކިރާފައިވާ މަހަށް 2.3 ބިލިއަން ރުފިޔާ ދައްކާފައިވާނެ ކަމަށް މިނިސްޓަރ އޮފް ފިޝެރީޒް އެންޑް އެގްރިކަލްޗަރ އަހުމަދު ޝިޔާމް ވިދާޅުވެއްޖެ އެވެ.

އަހާ ފޯރަމްގައި ވާހަަކަ ދައްކަވަމުން މިނިސްޓަރު ޝިޔާމް ވިދާޅުވީ މަސްވެރިންނަށް 48 ގަޑިއިރުގެ ތެރޭގައި ފައިސާ ދިނުމަށް ފެށިފަހުން ވެސް މަސްވެރިންނަށް 1.3 ބިލިއަން ރުފިޔާ ދައްކާ ހަލާސްކޮށްފައިވާނެ ކަމަށެވެ. އަދި މި ސަރުކާރު ވެރިކަމަށް އައިއިރު މަސްވެރިންނަށް ނުދީ ހުރި ހުރިހާ ފައިސާއެއްގެ ބެކްލޮގް މިހާރު ވަނީ ކްލިއަރ ކޮށްފައި ކަމަށް މިނިސްޓަރު ވިދާޅުވި އެވެ.

ނިމިދިޔަ ސަރުކާރުތަކުގައި މިފްކޯގެ ފަރާތުން އަދި އަމިއްލަ ކުންފުނިތަކުން މަސްވެރިންނަަށް 48 ގަޑިއިރުތެރޭގައި ފައިސާ ދީފައިނުވާކަމަށް ފާހަގަކޮށް މިނިސްޓަރު ޝިޔާމްް ވިދާޅުވީ، މިހާރު މިފްކޯ ބަނދަރަކުން ނުވަތަ އަމިއްލަ ކުންފުންޏެއްގެ ބަނދަރަކުން މަސްކިރި ނަަމަވެސް 48 ގަޑިއިރުގެ ތެރޭގައި މަސްވެރިންނަށް ފައިސާ ލިބޭނެ ކަމަށެވެ. އަދި މަސް ގަންނަމުންދަނީ 20 ރުފިޔާއަށްވުރެ ދަށްނުވާ އަދަދަކަށް ކަމަށް މިނިސްޓަރު ޝިޔާމް ވިދާޅުވި އެވެ.

ހަމައެއާއެކު މަސްވެރިންގެ އެދުމާއެކު މިފްކޯގެ ފެސިލިޓީތަކުން ތެޔޮ ގަންނަ ނަމަ ކްރެޑިޓަށް ތެޔޮ ލިބޭނެ ގޮތް މިހާރު ހަމަޖައްސާފައިވާނެކަމަށް މިނިސްޓަރު ޝިޔާމް ވިދާޅުވި އެވެ. އަދި މި ތެލަށް ފައިސާ ނަގަން ހަމަޖެހިފައިވަނީ މަސްވެރިޔާ މިފްކޯއަށް ކިރަން ގެންނަ މަހުން ކަމަށް މިނިސްޓަރު އިތުރަށް ވިދާޅުވި އެެވެ. ހަަމައެއާއެކު ތެޔޮ ވިއްކަނީ މިފްކޯއިން ނޫން ކަމަށާއި ތެޔޮ ވިއްކަނީ މިފްކޯގެ ފެސިލިޓީ ތަކުގައި އެފްއެސްއެމްގެ ފަރާތުން ކަމަށް މިނިސްޓަރު ވިދާޅުވި އެވެ.

މީގެ ކުރިން ދައުލަތުން މިފްކޯއަށް ސަބްސިޑީ ދޭންޖެހުމުގެ ސަބަބުން މަސްވެރިކަން ތަރައްްގީކުރުމަށް އެއްވެސް މަސައްކަތެއް ކުރެވިފައިނުވާކަަމަށް ފާހަގަކޮށް މިނިސްޓަރު ޝިޔާމް ވިދާޅުވީ މިހާރު މިފްކޯގެ ހިންގުން ވަނީ ހަރުދަނާ ކުރެވިފައި ކަމަށެވެ. އަދި ދައުލަތުން މިހާރު މިފްކޯއަށް ސަބްސިޑީ ދޭން ނުޖެހޭ ކަމަށް މިނިސްޓަރު ޝިޔާމް ވިދާޅުވި އެވެ.

މިނިސްޓަރު ޝިޔާމް ވިދާޅުވީ މިހާރު ރާއްޖޭގައި ކޯލްޑް ސްޓޯރޭޖްތަކާއި، ޕްރޮސެސިންގް ޕްލާންޓްތަކާއި، އައިސް ޕްލާންޓް އަދި ދޯނީގައި ލޮނު ފެނުން މަސް ފިނިކުރާ ނިޒާމްތައް ގާއިމުކޮށް މަސްވެރިންނަށް އިތުރު ލުއިތަކެއް ދިނުމަށް ރައީސުލްޖުމްހޫރިއްޔާގެ މެނިފެސްޓޯގެ ޒަރިއްޔާއިން މަސައްކަތް ކުރަމުންދާ ކަމަށެވެ.