ޕްރައިވެޓް ސެކިއުރިޓީ ޕްރޮފެޝަނަލް ކުރަން ސަރުކާރުގެ އެހީ ލިބޭނެ: މިނިސްޓަރު އިހުސާން

ރާއްޖެއަށް ޓޫރިސްޓުން ކުރާ އިތުބާރު ބިނާވަނީ ސަލާމަތާއި ރައްކާތެރިކަން އޮންނަ މިންވަރުގެ މައްޗަށް ކަމަށާއި، އެކަން ކަށަވަރުކުރުމަކީ ހަމައެކަނި ސަރުކާރުގެ ނުވަތަ ސަލާމަތީ ހިދުމަތްތަކުގެ ޒިންމާއެއް ނޫން ކަމަށާއި، ޕްރައިވެޓް ސެކިއުރިޓީ ޕްރޮފެޝަނަލް ކުރަން ސަރުކާރުގެ އެހީ ލިބޭނެ ކަމަށް މިނިސްޓަރ އޮފް ހޯމްލޭންޑް ސެކިއުރިޓީ ލޭބަރ އެންޑް ޓެކްނޮލޮޖީ، އަލީ އިހުސާން ވިދާޅުވެއްޖެ އެވެ.

މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ (މަފްސީ) އިން އިންތިޒާމުކޮށްގެން ބޭއްވި "ސޭފްޓީ އެންޑް ސެކިއުރިޓީ ކޮންފަރެންސް މޯލްޑިވްސް 2026" ގައި ވާހަކަ ދައްކަވަމުން މިނިސްޓަރު ވިދާޅުވީ، ރައްކާތެރިކަމަކީ ރާއްޖޭގެ މަޝްހޫރުކަމާއި ޓޫރިޒަމް ޕްރޮޑަކްޓުގެ މުހިންމު ބައެއް ކަމަށާއި، އެކަން ހިމާޔަތްކުރުމަކީ އެންމެންގެ ވެސް ޒިންމާއެއް ކަމަށެވެ.

މިނިސްޓަރު ފާހަގަކުރެއްވި ގޮތުގައި ޓޫރިޒަމް އިންޑަސްޓްރީގެ ވަށައިގެންވާ ސަލާމަތީ މާހައުލު މިހާރު ވަނީ ބަދަލުވެފަ އެވެ. އެގޮތުން ރައްކާތެރިކަމުގެ މައުއުލޫކީ ހަމައެކަނި އާންމު ކުށްތަކާ ގުޅޭ ވާހަކައެއް ނޫން ކަމަށާއި، އަލިފާނުގެ ހާދިސާތަކާއި، ކަނޑުމަތީގެ އެކްސިޑެންޓުތަކާއި، ސައިބާ އެޓޭކުތަކުގެ އިތުރުން މޫސުމީ ނުރައްކާތަކާއި އޮންލައިން ފްރައުޑު ފަދަ އައު ބާވަތުގެ ނުރައްކާތަކަށް ސަމާލުވާންޖެހޭ ކަމަށް ވިދާޅުވި އެވެ. ވަކިން ޚާއްސަކޮށް ރާއްޖެ ފަދަ ޖަޒީރާ ޤައުމެއްގައި، ހާދިސާއެއް ހިނގުމުން ފިޔަވަޅުއެޅުމުގެ ބަދަލުގައި ދުރާލައި ރައްކާތެރިކަމުގެ ފިޔަވަޅުތައް އެޅުން މުހިންމުކަން މިނިސްޓަރު ފާހަގަކުރެއްވި އެވެ.

މީގެ އިތުރުން، ހާދިސާއެއް ހިނގާ ވަގުތު އެންމެ ކުރީސަފުގައި ތިބެނީ ޕްރައިވެޓް ސެކިއުރިޓީ މުވައްޒަފުން ކަމަށްވާތީ، އެ މީހުންނަކީ ހަމައެކަނި ދޮރުމަތީގައި ތިބޭ ބައެއްގެ ބަދަލުގައި އިމަޖެންސީ ރެސްޕޮންސް ދަންނަ ޕްރޮފެޝަނަލް ބަޔަކަށް ހަދަންޖެހޭ ކަމަށް މިނިސްޓަރު ވިދާޅުވި އެވެ.

މިނިސްޓަރު ވަނީ ޕްރައިވެޓް ސެކިއުރިޓީ ދާއިރާގައި މަސައްކަތްކުރާ ފަރާތްތަކަށް އެކަށީގެންވާ ތަމުރީނާއި، މިންގަނޑުތަކާއި، ސެޓްފިކެޓް ދެވޭނެ ހަރުދަނާ ނިޒާމެއް ޤާއިމުކުރުމަށް މަފްސީއާއެކު ހޯމް މިނިސްޓްރީ އިން ގާތުން މަސައްކަތްކޮށް އެހީތެރިކަން ފޯރުކޮށްދޭނެ ކަމުގެ ޔަޤީންކަން ދެއްވައިފަ އެވެ.

"އަޅުގަނޑު އުފާވޭ ޕްރައިވެޓް ސެކިއުރިޓީ ޕްރޮފެޝަނަލް ކުރަން މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ، މަފްސީ އިން މަސައްކަތް ކުރާތީ. އަޅުގަނޑު މިއަދު ތިޔަބޭފުޅުންނަށް މިދެނީ މިކަމަށް އަޅުގަނޑުމެން (ހޯމް މިނިސްޓްރީ އިން) އެހީތެރިވާނެ ކަމުގެ ޔަގީންކަން،" މިނިސްޓަރު ވިދާޅުވި އެވެ