އޭޝިއަން ގޭމްސް: ޔަސީން ދިވެހި ޓީމު ފަހުރުވެރި ކޮށްދީފި

އޭޝިއަން ގޭމްސް އައިޗީ-ނަގޯޔާ 2026ގައި ދިވެހި ސާފިން ޓީމުގެ ޒުވާން އެތުލީޓު ޔަސީން އަހުމަދު ނާޝިދު ވާދަކުރި ތިންވަނަ ބުރުގެ ހީޓާ އެކު ދިވެހި ސާފިން ޓީމު މުބާރަތް ނިންމާލައިފި އެވެ.

މުޅިން އަލަށް އޭޝިއަން ގޭމްސްގައި ސާފިން ހިމަނާފައި ވާއިރު، މި ގޭމްސްގައި ރާއްޖޭގެ ފިރިހެން އަދި އަންހެން ދެ އެތުލީޓުން ވާދަ ކޮށްފައިވެ އެވެ.

އައިޗީ ޓަހާރާ ލޯންގް ބީޗްގައި ކުރިއަށްދާ އޭޝިއަން ގޭމްސްގެ ސާފިންގް އިވެންޓްތަކުގައި ދިވެހި ޓީމުން ފިރިހެނުންގެ ޝޯޓްބޯޑް ތިންވަނަ ބުރަށް ދިޔައީ ޔަސީން އެކަންޏެވެ.

މިއަދު ފަތިހު ކުރިއަށް ދިޔަ މި އިވެންޓުގެ ހީޓު 3 ގައި ޔަސިން ވަނީ 8.44 ޕޮއިންޓް ހޯދައިފަ އެވެ. މި ހީޓުގައި ޔަސިންއާއި ވާދަކުރި ޗައިނާގެ ޝީޑޮންގް ވު ވަނީ 10.93 ޕޮއިންޓް ހޯދައިގެން ކުއާޓާގެ ޖާގަ ހޯދައިފަ އެވެ.

އުމުރުން 16 އަހަރުގެ ޔަސިން ވަނީ އޭޝިއަން ގޭމްސްގައި ވާދަކުރިން ހުރިހާ ހީޓެއްގައިވެސް 8 ޕޮއިންޓަށްވުރެ މަތީ ސްކޯތަކެއް ހޯދައިފަ އެވެ. އެގޮތުން ފުރަތަމަ ބުރުގައި 8.50 އަދި ދެވަނަ ބުރުގައި 8.13 ޕޮއިންޓާ އެކު އޭނާ ވަނީ ހީޓް ކާމިޔާބު ވެސް ކޮށްފަ އެވެ.

އޭޝިއަން ގޭމްސްގައި ވާދަކުރި ދިވެހި ސާފިން ޓީމް -- ފޮޓޯ/ އެމްއޯސީ: މަހްފޫޒް، ނައުޝަމް

ޔަސީން އަކީ ފާހަގަ ކޮށްލެވޭވަރުގެ ބޮޑެތި ކުރިއެރުންތަކެއް ހޯދަމުން އަންނަ އެތުލީޓެކެވެ. އޭނާ ވަނީ ދިވެހި ސާފް ލީގުގައި އެންމެ ފަހުން އޮތް އޯޕަން ޑިވިޝަންގެ ހަތަރު މުބާރާތުން ވެސް އެއްވަނަ ހޯދައިފަ އެވެ.

އިއްޔެ ކުރިއަށް ދިޔަ ދެވަނަ ބުރުގެ ހީޓު 6 ގައި ދިވެހި ޓީމުގެ ކަޔާން އަބްދުﷲ އަރީފް ވަނީ 5.67 ޕޮއިންޓް ހޯދާފައެވެ. މިހީޓުގައި ކަޔާންއާއި ވާދަކުރި، ތައިލޭންޑުގެ ނައްތަކްރޮން ސައޭ-އިއޫ ވަނީ 11.20 ޕޮއިންޓު ހޯދައިފަ އެވެ.

އަންހެނުންގެ ޝޯޓްބޯޑް ދެވަނަ ބުރުގެ ހީޓް 6 ގައި ވާދަކޮށް އައިމިނަތު ތާނީސް ޝިރަން 1.30 ޕޮއިންޓް ހޯދާފައި ވާއިރު، މި ބުރުގެ ހީޓު 2 ގައި ވާދަކޮށް މަރިޔަމް ރާހިލް ނަސީމް (އާޔާ) ވަނީ 1.20 ޕޮއިންޓް ހޯދައިފަ އެވެ. ތާނީސްއާއި ވާދަކުރި މެލޭޝިއާގެ މޯނާ ރަޝީދާ އަބްދުއްރަޝީދު ކުރި ހޯދީ 2.60 ޕޮއިންޓް ހޯދައިގެންނެވެ. އަދި އާޔާ އާ ވާދަކުރި ދެކުނު ކޮރެއާގެ ނަލާ ލީ ވަނީ 8.20 ޕޮއިންޓު ހޯދައިފަ އެވެ.