އޭޝިއަން ގޭމްސް 2026: ފިރިހެނުންގެ 400 މީޓަރު ރިލޭ އިވެންޓާ އެކު ރާއްޖޭން ގޭމްސް ނިންމާލައިފި

އޭޝިއަން ގޭމްސް އައިޗީ-ނަގޯޔާ 2026ގައި ދިވެހި އެތުލެޓިކްސް ޓީމުން ފިރިހެނުންގެ 4 ގުނަ 400 މީޓަރު ރިލޭގައި ވާދަ ކޮށްފި އެވެ.

ނަގޯޔާގެ މިޒުހޯ ޕާކް އެތުލެޓިކް ސްޓޭޑިއަމްގައި އިއްޔެ އޮތް ފިރިހެނުންގެ 4 ގުނަ 400 މީޓަރު ރިލޭގެ ހީޓު 1 ގައި ދިވެހި ޓީމުން ރޭސް ނިންމާފައި ވަނީ 3:18.54 އިންނެވެ.

ދިވެހި ޓީމުން މި ރިލޭގައި ދުވީ ހަސަން ސާއިދާއި، އާދަމް ރިއްފަތާއި، ހުސެއިން ޒީކް ސުއާދުގެ އިތުރުން މުޙައްމަދު ޒުއިޒް ސައުދެވެ.

މި އިވެންޓާއެކު 20 ވަނަ އޭޝިއަން ގޭމްސްގައި ދިވެހިރާއްޖެ ވާދަކުރަން ހުރި ހުރިހާ އިވެންޓްތަކެއް ވެސް މިވަނީ ނިމިފަ އެވެ.

މި އަހަރުގެ އޭޝިއަން ގޭމްސްގައި ރާއްޖޭން ހަތް ކުޅިވަރެއްގައި ވާދަ ކުރި އެވެ. އެއީ އެތުލެޓިކްސްގެ އިތުރުން ބެޑްމިންޓަން، ބީޗް ވޮލީ، ޝޫޓިން، ސާފިން، ސްވިމިން އަދި ޓީޓީ އެވެ.