ސުޒެއިރު 10 މެޗަށް ސަސްޕެންޑް ކޮށް ޖޫރިމަނާ ކޮށްފި

ދިވެހި ޕްރިމިއަރ ލީގުގައި ނިއުރޭޑިއަންޓާއި މާޒިޔާ ބައްދަލުކުރި މެޗުގެ ތެރެއިން ހިނގައިދިޔަ މާރާމާރީގެ މައްސަލައިގައި، މާޒިޔާގެ އެސިސްޓެންޓް ކޯޗު އަހުމަދު ސުޒެއިރު (ކޮއްކޮ) އަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ފިޔަވަޅު އަޅައިފި އެވެ.

މިމަހުގެ 17 ވަނަ ދުވަހުގެރޭ ގަލޮޅު ދަނޑުގައި ކުޅުނު މި މެޗުގެ 68 ވަނަ މިނެޓުގައި ދެޓީމުގެ ކުޅުންތެރިންނާއި އޮފިޝަލުންގެ މެދުގައި ހިނގި ހަމަނުޖެހުމުގެ ތެރެއިން، ސުޒެއިރު ވަނީ ނިއުގެ އެސިސްޓެންޓް ކޯޗު ލޫސިއާނޯގެ މޫނުމަތީގައި ޖަހާފައެވެ.

މި މައްސަލަ ބެލުމަށްފަހު އެފްއޭއެމްގެ ޑިސިޕްލިނަރީ އެންޑް އެތިކްސް ކޯޑުގެ ދަށުން ވަނީ އޭނާ 10 މެޗަށް ސަސްޕެންޑް ކޮށް 15،000 ރުފިޔާއިން ޖޫރިމަނާ ކޮށްފަ އެވެ. އަދި މި ފައިސާ 15 ދުވަހުގެ ތެރޭގައި ދައްކަންޖެހޭނެ ކަމަށް އެފްއޭއެމުން ހާމަ ކުރެ އެވެ.

މި މައްސަލަ ފުރަތަމަ ނިއުރޭޑިއަންޓުގެ ފަރާތުން އެފްއޭއެމްގެ އިތުރުން ފުލުހަށް ވެސް ހުށަހެޅި އެވެ. ނަމަވެސް ފަހުން ނިއުއިން ވަނީ ފުލުހަށް ހުށަހެޅި މައްސަލަ އަނބުރާ ނަގާފައިކަމަށް މީޑިއާތަކުން ރިޕޯޓްކުރެ އެވެ.

އެފްއޭއެމްއިން ބުނި ގޮތުގައި، މި ނިންމުން އެޕީލްކުރަން ބޭނުންނަމަ ތިން ދުވަހުގެ ތެރޭގައި އެކަން އަންގަންޖެހޭނެއެވެ. މި ހަމަނުޖެހުމާ ގުޅިގެން މެޗު ހަތް މިނިޓަށް މެދުކަނޑާލާފައިވެ އެވެ.