ވިކްޓަރީއަށް ކުރިން ކުޅުނު ތެއިލާ، އޮޑި ސްޕޯޓްސްގެ ކޯޗަކަށް

އޮޑި ސްޕޯޓްސް ކްލަބްގެ ހެޑް ކޯޗުގެ މަގާމަށް، ކުރިން ވިކްޓަރީ ސްޕޯޓްސް ކްލަބަށް ކުޅުނު އާޖެންޓީނާގެ ލޫސިއާނޯ ތެއިލާ ހަމަޖައްސައިފި އެވެ.

މިއީ މި ސީޒަނުގައި އޮޑި އަށް އިރުޝާދު ދޭން ގެނައި ދެވަނަ ކޯޗެވެ. ސީޒަން ފެށިއިރު އޮޑީގެ ކޯޗަކަށް ހުރި ޕޯޗުގަލްގެ ރުއި ގްރެގޯރިއޯ ދެ މެޗަށްފަހު އެއްބަސްވުން އުވާލުމާ ގުޅިގެން، އެންމެ ފަހުން ލީގުގައި ބުރު ސްޕޯޓްސް އަތުން 4-1 އިން އޮޑި މޮޅުވި މެޗުގައި އިރުޝާދު ދިނީ އެސިސްޓަންޓް ކޯޗު އަހުމަދު ފައްރާހު (ފައްރަ) އެވެ.

ކްރޮއޭޝިއާގެ ރަށްވެހިކަންވެސް އޮންނަ ތެއިލާ ވަނީ 2008 ވަނަ އަހަރު ދިވެހި ލީގުގައި ވިކްޓަރީ ސްޕޯޓްސް ކްލަބަށް ކުޅެފަ އެވެ.

ކޮންމެބޯލް އަދި ޔުއެފާ ޕްރޯ ލައިސަންސް އޮންނަ ތެއިލާ ވަނީ އާޖެންޓީނާ، ޕެރަގުއޭ، ޕެރޫ އަދި ބޮލިވިއާގެ ކްލަބްތަކަށް ހެޑް ކޯޗުކަން ކޮށްދީފައެވެ. އެންމެ ފަހުން އޭނާ ހުރީ ޔުއެފާ ކޮންފަރެންސް ލީގުގައި ކުޅުނު އިޒްރޭލުގެ މެކަބީ ހައިފާގެ އެސިސްޓަންޓް ކޯޗަކަށެވެ. މިއީ އޭޝިއާގައި އޭނާ ކޯޗިން މަސައްކަތްކުރާ ފުރަތަމަ ފަހަރެވެ.

ކުޅުންތެރިއެއްގެ ގޮތުގައި ރާއްޖޭގެ އިތުރުން ބަންގްލަދޭޝް، އިންޑޮނޭޝިއާ، ލެބަނަން އަދި ސީރިއާގެ ކްލަބްތަކަށް އޭނާ ވަނީ ކުޅެފަ އެވެ.

އިންޓަނޭޝަނަލް ބްރޭކަށްފަހު ދިވެހި ޕްރިމިއާ ލީގު އަލުން ފަށައިގެން މި މަހުގެ ނުވަވަނަ ދުވަހު އޮޑި ނުކުންނާނީ ގދ. ގައްދޫ ފުޓްބޯޅަ ޓީމާ ދެކޮޅަށެވެ.