ޒުވާން ބޮޑީބޯޑަރު އިޔަން ސްޕެއިންގެ މުބާރާތަކަށް ކޮލިފައި ވެއްޖެ

ސްޕެއިންގެ ކެނޭރިއާ އައިލެންޑްސްގެ ގަލްދާރުގައި އޮކްޓޫބަރު 17-31 އަށް ކުރިއަށްދާ އައިބީސީ ޓުއާ "ގްރޭން ކެނޭރިއާ ފްރޮންޓޯން ކިންގް" މުބާރާތުގެ ޖޫނިއާ މެންސް އިވެންޓަށް ރާއްޖޭގެ ހުނަރުވެރި ބޮޑީބޯޑަރު އިޔަން އަހުމަދު ކޮލިފައި ވެއްޖެ އެވެ.

އައިބީސީން އާންމުކުރި ކޮލިފައިވި އެތުލީޓުންގެ ލިސްޓުގެ 10 ވަނައިގައި ގައުމީ ޓީމުގައި ހިމެނޭ އިޔަން ހިމެނިފައިވާއިރު، މިއަހަރު އޭނާ އަންނަނީ މުބާރާތްތަކުގައި ފާހަގަ ކޮށްލެވޭވަރުގެ މޮޅު ޕާފޯމަންސްތަކެއް ދައްކަމުންނެވެ.

އެގޮތުން އިޔަން ވަނީ މިދިޔަ އޮގަސްޓް މަހު ކ. ތުލުސްދޫ ކޯކްސް ރާޅުގަނޑުގައި ބޭއްވި އައިބީސީ ޓުއާ މޯލްޑިވްސް ޕްރޯގެ ޖޫނިއާ މެންސް ރައިސިން ސީރީސްގެ ޗެމްޕިއަންކަން ހޯދައިފަ އެވެ. ފައިނަލް ހީޓުގައި އިޔަން ވަނީ 13.90 ޕޮއިންޓާއެކު، ނޫހު މުހައްމަދު ދުނައިމް އިރުޝާދުގެ މައްޗަށް 0.15 ޕޮއިންޓުގެ ފަރަގަކުން ކުރި ހޯދައިފަ އެވެ.

މީގެ އިތުރުން މިދިޔަ އަހަރުގެ ގައުމީ ޖޫނިއާ ބޮޑީބޯޑިން ލީގު ޗެމްޕިއަން އިޔަން ވަނީ މިއަހަރުގެ ފެބްރުއަރީ މަހު މޮރޮކޯ ވޯލްޑް ބޮޑީބޯޑް ޗެމްޕިއަންޝިޕްގެ ޖޫނިއާ ބައިގެ ދެވަނަ ބުރުގައި ވެސް ވާދަކޮށްފަ އެވެ.