ބީއެމްއެލް އޭޓީއެމުން މަހަކު ދެން ނެގޭނީ ގިނަވެގެން 3،500 ޑޮލަރު

ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމްތަކުން މަހެއްގެ މައްޗަށް ނަގުދު ފައިސާގެ ގޮތުގައި ދެން ނެގޭނީ ގިނަވެގެން 3,500 ޑޮލަރު ކަމަށް އެ ބޭންކުން އިއްޔެ ކަނޑައަޅައިފި އެވެ.

މިއީ ބީއެމްއެލްގެ އޭޓީއެމްތަކުން މަހަކު ޑޮލަރު ނެގޭނެ ވަކި ލިމިޓެއް ކަނޑައެޅި ފުރަތަމަ ފަހަރެވެ.

މި ބަދަލާއެކުވެސް، އޭޓީއެމް ކާޑަކުން ދުވާލަކު 1,600 ޑޮލަރާ ހަމައަށް ނަގުދު ފައިސާ ނެގޭނެ އެވެ. ނަމަވެސް މަހެއްގެ މައްޗަށް ޖުމްލަ 3,500 ޑޮލަރު ހަމަވުމުން، އެ މަހަކު ދެން އިތުރަށް އޭޓީއެމުން ޑޮލަރެއް ނުނެގޭނެ އެވެ.

ބީއެމްއެލް އިން ބުނީ މިއީ 'ޑިޖިޓަލް-ފަސްޓް' ބޭންކިން ނިޒާމެއް ފުޅާކޮށް، ނަގުދު ފައިސާއަށް ބަރޯސާވާ މިންވަރު ކުޑަކުރުމަށް ގެންގުޅޭ ދުރުރާސްތާ ސިޔާސަތުގެ ދަށުން ނިންމި ނިންމުމެއް ކަމަށެވެ. އެގޮތުން މޮބައިލް އަދި އިންޓަނެޓް ބޭންކިން މެދުވެރިކޮށް ވަގުތުން ފައިސާ ފޮނުވުމާއި، ރާއްޖެއާއި ރާއްޖެއިން ބޭރުގައި ކާޑާއި ކޮންޓެކްޓްލެސްކޮށް ފައިސާ ދެއްކޭނެ ލުއިފަސޭހަ އިންތިޒާމުތައް ގާއިމު ކުރުމަށް އެ ބޭންކުން ބޮޑެތި އިންވެސްޓްމަންޓްތަކެއް ކޮށްފައިވާކަން ބޭންކުން ފާހަގަކުރެއެވެ.