ފުލުހުންގެ ބެލުމުގެ ދަށުގައިހުރި 2000 އަށްވުރެ ބަނގުރާ ފުޅި ނައްތާލައިފި

ދިވެހި ފުލުހުންގެ ޚިދުމަތުގެ ބެލުމުގެ ދަށުގައިހުރި ބަނގުރާ ފުޅިތަކެއް ނައްތާލާފައިވާ ކަމަށް އެ އިދާރާ އިން ހާމަކޮށްފި އެވެ.

ފުލުހުން ބުނީ މި ތަކެއްޗަކި އެ ޚިދުމަތަށް ހުށަހެޅިފައިވާ ބަނގުރަލުގެ މައްސަލަތަކުގެ ތެރެއިން ޑްރަގު އެންފޯސްމަންޓުގެ ބެލުމުގެ ދަށަށް ގެނެވިފައިވާ ތިން ހާދިސާއެއްގައި ހިމެނޭ ބަނގުރަލެވެ.

މީގެ އިތުރުން ފުލުހުން ބުނީ އެ ފުޅިތައް ނައްތާލާގައި ވަނީ އޮކްޓޫބަރު މަހުގެ ފަސް ވަނަ ދުވަހު ދޫނިދޫގައި ކަަމަށެވެ. އެގޮތުން ނައްތާލާފައި ވަނީ 500 އެމްއެލްގެ 2547 ފުޅި ބަނގުރަލާއި، 5 ލީޓަރުގެ 23 ފުޅި ބަނގުރާ އަދި އެހެނިހެން ތަކެތީގެ ގޮތުގައި ނުވަ އައިޓަމެއް ކަމަށެވެ. އެގޮތުން ނައްތާލި އެހެނިހެން ތަކެތީގެ ތެރޭގައި ޕްލާސްޓިކް ހިމެނޭ ކަމަށް ފުލުހުން ބުނެފައިވެ އެވެ.

ބަނގުރާ ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމު ގެދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަަމަށްޓަކައި އެކުލަވައިލި ކޮމެޓީގެ ބެލުމުގެ ދަށުން ކަމަށް ވެސް ފުލުހުން ބުނެފައިވެ އެވެ.