އީގަލް ހިލްސާއެކު ވި އެއްބަސްވުމުގައި ޤާނޫނުން ބޭރު އެއްވެސް ކަމެއް ނޯންނާނެ: ރައީސް

އީގަލް ހިލްސާއެކު ވި އެއްބަސްވުމުގައި ގާނޫނުން ބޭރު އެއްވެސް ކަމެއް ނޯންނާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ޕީއެސްއެމްގެ "ނޭޝަން ޗެޓް"ގައި ރޭ ވާހަކަދައްކަވަމުން ރައީސް ޑރ. މުއިއްޒު ވިދާޅުވީ ސިޔާސީ ވިސްނުމުގައި ތަސައްވަރު އޮޅޭގޮތަށް ރަސްމާލެއާ ގުޅޭގޮތުން ވާހަކަދައްކަނީ ރައްޔިތުންނަށް ފައިދާވާ މިފަދަ ބޮޑެތި މަޝްރޫއުތައް ރާއްޖެއަށް ގެނައުމުން ހުރަސްއަޅަންކަމަށެވެ.

ރަސްމާލެ ތަރައްޤީކުރުމަށް ސަރުކާރުން ގެންގުޅޭ ތަސައްވުރަށް އީގަލް ހިލްސް މަޝްރޫޢުއާއެކު އެއްވެސް ބަދަލެއް ނާންނަކަމަށާއި، މިއީ ރައްޔިތުންގެ އުއްމީދުތައް ފުރިހަމައަށް ހާސިލުވާނެ މަޝްރޫއެއް ކަމަށް ވެސް ރައީސް ވިދާޅުވިއެވެ.

އެ މެޝްރޫއުގެ ސަބަބުން ގައުމަށް ފައިދާ ކުރާނީ ހަމައެކަނި އިގްތިސާދީ ގޮތުން ނޫންކަމަށާއި، އިޖުތިމާއީ ގޮތުންނާއި އުމްރާނީ ގޮތުން ވެސް ގައުމަށް އެ މަޝްރޫއުގެ ފައިދާ ކުރާނެކަމަށް ވެސް އެމަނިކުފާނު ވިދާޅުވިއެވެ.

ރަސްމާލެ މަޝްރޫއަކީ ރައްޔިތުންގެ ދިރިއުޅުމުގެ ފެންވަރު ވެސް މަތިކޮށްދޭނެ މަޝްރޫއެއްކަމަށެވެ.

ރަސްމާލެއަކީ ރާއްޖޭގެ އެންމެ ބިންބޮޑު ރަށްކަމަށާއި، އެ މަޝްރޫއު ފެށިގެން އެކިކަަހަލަ އނދަގޫތައް ކުރިމަތިވިކަމަށް ވެސް ރައީސް ވިދާޅުވިއެވެ. އެ އުދަގޫތަކަކީ އެ މަޝްރޫއު ބޮޑުވުމުން ކުރިމަތިވި ކަންކަންކަމަށް ވެސް ރައީސް ވިދާޅުވިއެވެ.

އެމަނިކުފާނު ވިދާޅުވީ ރަސްމާލޭގެ ބިން ހިއްކުމުގެ މަސައްކަތް މިއަހަރު ނިމެންވާއިރަށް ނިންމޭނެކަމަށް ވަރަށް ބޮޑަށް ލަފާކުރެވޭކަމަށެވެ. މިހާރު ވެސް ބިން ހިއްކުމުގެ 70 އިންސައްތަ މަސައްކަތް ނިމިފައިވާކަމަށް ވެސް ރައީސް ވިދާޅުވިއެވެ.