މިނިސްޓަރުންގެ 9 ވަނަ "އަހާ" ފޯރަމް މިރޭ

ސަރުކާރުން މިނިސްޓަރުން ބައިވެރިވެ ވަޑައިގަންނަވާ "އަހާ" ފޯރަމްގެ ނުވަ ވަނަ ފޯރަމް މިރޭ އޮންނާނެ އެވެ.

މިއީ ރައީސް އޮފީހާއި، ދައުލަތުގެ މީޑިއާ (ޕީއެސްއެމް) ގުޅިގެން ގެނެސްދޭ ފޯރަމް އެކެވެ. މި ފޯރަމް ބާއްވަނީ ސަރުކާރުގެ މިނިސްޓްރީ ތަކުން ކުރަމުން އަންނަ މަސައްކަތްތަކުގެ މައުލޫމާތު ރައްޔިތުންނާ ހިއްސާކުރުމާއި، ރައްޔިތުންގެ ސުވާލުތަކަށް މިނިސްޓަރުން ޖަވާބު ދެއްވުމުގެ މަޤުސަދުގައި އެވެ.

މިރޭގެ އޮންނަ ފޯރަމްގައި ވެސް ތިން މިނިސްޓަރަކު ބައިވެރިވެ ވަޑައިގަންނަވާނެ އެވެ. އެއީ ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުޙައްމަދު އަމީން އާއި، ހެލްތު މިނިސްޓަރު ޤީލާ އަލީ އަދި އާޓްސް ކަލްޗާ އެންޑް ހެރިޓޭޖް މިނިސްޓަރު ހީނާ ވަލީދު އެވެ. މިރޭގެ ފޯރަމް ވެސް ފަށާނީ 21:00 ގައި އެވެ.

މި ފޯރަމްގައި އެތަނަށް ހާޒިރުވެ ސުވާލު ކުރުމުގެ ފުރުސަތު އޮންނައިރު، ސޯޝަލް މީޑިިއާގެ ފްލެޓްފޯމްތައް މެދުވެރިކޮށް ވެސް ސުވާލު ކުރުމުގެ ފުރުސަތު ރައްޔިތުންނަށް އޮންނާނެ އެވެ. މިރޭ ބޭއްވުމަށް ހަަމަޖެހިފައި ވަނީ "އަހާ" ފޯރަމްގެ ނުވަ ވަނަ ފޯރަމް އެވެ.