ޖަރުމަން ލީގު ކުޅޭ ޗަކްރޫންގެ ހެޓްރިކަކުން ރާއްޖެ ބަލި ވެއްޖެ

ބައިނަލްއަގުވާމީ އެކުވެރިކަމުގެ މެޗުގައި ލުބުނާނާ ވާދަކޮށް 6-0 އިން ދިވެހިރާއްޖެ ބަލި ވެއްޖެ އެވެ.

ކިރިގިސްތާނުގައި ރޭ ކުޅުނު މި މެޗުގެ ފުރަތަމަ ހާފުގައި ލުބުނާންގެ ފޯވާޑް، ޖަރުމަން ބުންޑެސްލިގާ 2 ގެ ހަނޮވާ 96 އަށް ކުޅެމުން އަންނަ ހުސޭން ޗަކްރޫން ވަނީ ހެޓްރިކް ހަދައިފަ އެވެ. ޖަރުމަނަށް އުފަން 21 އަހަރުގެ މި ކުޅުންތެރިޔާ ވަނީ ލުބުނާންގެ ގައުމީ ޓީމުގައި ހެޓްރިކް ހެދި ނުވަވަނަ ކުޅުންތެރިޔާއަށް ވެފަ އެވެ.

ޗަކްރޫން (ޖޯޒީ 10) -- ފޮޓޯ/ ލުބުނާން އެފްއޭ

ދެވަނަ ހާފުގައި ލުބުނާނުން ލީޑު އިތުރަށް ފުޅާ ކުރީ ހައުމަދު މާއިޝް ރަޝީދު (މާއި) އަތުން ބައިކޮޅަށް ވަން ލަނޑަކުންނެވެ. މެޗުގެ ފަހު ވަގުތު ލުބުނާނުގެ ފަހު ދެ ލަނޑު ޖަހައިދިނީ އަލީ ގައްސާސް އެވެ.

މިއީ ރާއްޖެ އާއި ލުބުނާން ބައްދަލުކުރި ހަވަނަ މެޗެވެ. ހަ މެޗުން ވެސް ކުރި ހޯދާފައި ވަނީ ލުބުނާނެވެ.

މި ނަތީޖާއާ އެކު ރާއްޖެ ވަނީ މި އިންޓަނޭޝަނަލް ބްރޭކުގައި ކުޅުނު ތިން މެޗުން ވެސް ބަލި ވެފަ އެވެ. މި މެޗުގެ ކުރިން ކިރިގިސްތާޏް އަތުން 5-0 އިން ބަލި ވި އިރު ފުރަތަމަ މެޗުގައި ވަނީ ޗައިނާއާ ވާދަކޮށް 3-0 އިން ބަލި ވެފަ އެވެ.