މުލިހިތައް އޮތް އަމީނީ މަގުގެ މަރާމާތުކުރި ބައި އާންމުންނަށް ހުޅުވާލައިފި

މާލޭ މަގުތައް ހެދުމުގެ މަޝްރޫއުގެ ދަށުން އަމީނީ މަގާއި އިއްޒުއްދީން މަގު އަދި ބޮޑުތަކުރުފާނު މަގު މަރާމާތު ކުރުމުގެ މަސައްކަތުގެ ތެރެއިން އަމީނީ މަގުގެ ސެގްމަންޓް 1 އަދި  2 ގެ މަސައްކަތް ނިންމައި އާންމުންނަށް ހުޅުވާލައިފިއެވެ.

ސެގްމަންޓް 1 ގެ ދަށުން ކުރި މަސައްކަތްތަކުގެ ތެރޭގައި ކުރިން އަޅާފައިވާ އެގްރިގޭޓް ބޭސް ކޯސް (އޭބީސީ) އަދި ތާރު ނެގުމަށްފަހު، 2,794.062 އަކަމީޓަރުގެ ސަރަހައްދެއްގައި ސްބްގްރޭޑް، ސަބްބޭސް، އޭބީސީ އަދި ތާރު އެޅުމުގެ މަސައްކަތް ހިމެނެ އެވެ. މީގެ އިތުރުން މި ސެގްމަންޓުގެ ދަށުން މަގުމަތީގެ ނިޝާންތައް ކުރެހުމުގެ މަސައްކަތް ވަނީ ނިންމާލާފަ އެވެ.

ސެގްމަންޓް 2 ގެ ދަށުން ކުރި މަސައްކަތްތަކުގެ ތެރޭގައި 133.64 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު، އަލުން އެ ސަރަހައްދުގައި އޭބީސީ އެޅުމާއި ތާރު އެޅުމުގެ މަސައްކަތް ހިމެނެ އެވެ.

ސެގްމަންޓް 1 އަދި 2 ގެ މަސައްކަތް ނިމުމާ އެކު މި މަޝްރޫއުގެ ދަށުން ދެން ހަމަޖެހިފައިވާ ބައިތަކުގެ މަސައްކަތް ވެސް ކުރިއަށް ދާނެ ކަމަށް އެމްޓީސީސީން ބުންޏެވެ. އަމީނީ މަގުގެ މި ސެގްމަންޓުގެ މަސައްކަތް ނިމި، އެ ސަރަހައްދު ހުޅުވާލުމާ އެކު މި މަގު ބޭނުންކުރުމުގައި ކުރިން ހުރި ދަތިތައް ހައްލުވެ، މަގު ބޭނުންކުރާ ހުރިހާ ފަރާތްތަކަށް ވެސް ބޮޑު ލުއިތަކެއް ލިބޭނެ ކަމަށް އެމްޓީސީސީން އުއްމީދު ކުރެ އެވެ.

އިއްޒުންދީން ހިނގުމުން ފެށިގެން ކޯރުކެނޑި ހިނގުމާ ހަމައަށް ހިމެނޭ ސެގްމެންޓް 3 ގެ މަސައްކަތުގެ ތެރޭގައި 1,924.77 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު، އަލުން އޭބީސީއާ ތާރު އެޅުމާއި އަދި މަގުމަތީގެ ނިޝާންތައް ކުރެހުމުގެ މަސައްކަތް ހިމެނެ އެވެ.

މީގެ އިތުރުން ކޯރުކެނޑި ހިނގުމުން ފެށިގެން ގިޔާސުއްދީން އިންޓަނޭޝަނަލް ސުކޫލާ ހަމައަށް ހިމެނޭ ސެގްމަންޓް 4 ގެ މަސައްކަތުގެ ތެރޭގައި 1,148.91 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު، އަލުން އޭބީސީއާއި ތާރު އެޅުމާއި އަދި މަގުމަތީގެ ނިޝާންތައް ކުރެހުމުގެ މަސައްކަތް ހިމެނެ އެވެ.