ޗެސް އޮލިމްޕިއާޑް 2026: ރާއްޖޭގެ އަންހެން ޓީމު "ކެޓަގަރީ އީ" އިން ތާރީހީ ރަން މެޑަލް ހޯދައިފި!

އުޒްބެކިސްތާނުގެ ސަމަރްކަންދުގެ ކުރިއަށްދިޔަ 46 ވަނަ ފީޑޭ ޗެސް އޮލިމްޕިއާޑްގެ "ކެޓަގަރީ އީ" އިން އެއްވަނަ ހޯދައި، ރާއްޖޭގެ ގައުމީ އަންހެން ޗެސް ޓީމުން ތާރީހީ ރަން މެޑަލެއް ހާސިލުކޮށްފި އެވެ.

މިއީ ޗެސް އޮލިމްޕިއާޑެއްގައި ރާއްޖޭގެ އަންހެން ޓީމަށް ލިބުނު މިފަދަ ފުރަތަމަ ރަން މެޑަލް އެވެ. ރާއްޖޭގެ ފިރިހެން ޓީމު ވަނީ 2022 ގައި "ކެޓެގަރީ އީ" ގައި ވާދަކޮށް ރަން މެޑަލް ހޯދައިފަ އެވެ. އަދި މިހާރު ފިރިހެން ޓީމު ވާދަ ކުރަމުން އަންނަނީ "ކެޓެގަރީ ޑީ" ގަ އެވެ.

ޖުމްލަ 37 ގައުމު ވާދަކުރި "ކެޓަގަރީ އީ" ގެ 11 ރައުންޑު ކުޅެ ނިމުނުއިރު، ރާއްޖެއާއި ޓަންޒޭނިއާ އެއްވަރުވީ 21.5 ޕޮއިންޓާއެކު އެވެ. ނަމަވެސް، ޓައިބްރޭކް އުސޫލުން ގޭމް ޕޮއިންޓުގެ ކުރިއެރުން ލިބިގެން ރާއްޖޭގެ ޓީމަށް ވަނީ ތާވަލުގެ އެއްވަނަ ލިބިފަ އެވެ. މި ކާމިޔާބީއާ އެކު ރާއްޖޭގެ އަންހެން ޓީމު ވަނީ ކެޓެގަރީ ޑީ އަށް ޕްރޮމޯޓް ވެފަ އެވެ.

މުބާރާތް ފެށުނުއިރު ރާއްޖެއަށްވުރެ ރޭންކިން މަތީ 6 ގައުމު އޮތް ނަމަވެސް، ރާއްޖޭގެ ކުޅުންތެރިން ވަނީ ވަރުގަދަ ޓީމުތަކާ ދެކޮޅަށް ކުޅެ ބޮޑު ކާމިޔާބީތަކެއް ހޯދައިފަ އެވެ.

އެގޮތުން ވުމަން ކެންޑިޑޭޓް މާސްޓާ ނިހާޔާ އަހުމަދު ކުޅުނު މެޗުތަކުން 7 ޕޮއިންޓް ހޯދި އިރު މަރިޔަމް ލައިސާ އަބްދުއްރަޝީދު އަދި އީނާ ޢަބްދުﷲ ހަސަން ކޮންމެ ކުޅުންތެރިއަކު 5.5 ޕޮއިންޓް ހޯދައިގެން ވަނީ ވުމަން ކެންޑިޑޭޓް މާސްޓާ (ޑަބްލިއުސީއެމް) ޓައިޓަލް ވެސް ހާސިލު ކޮށްފަ އެވެ. މީގެ އިތުރުން އާއިޝަތު ނޯޔާ ޝާހުރުއްދީން ޝަރީފް 3 މެޗުން މޮޅުވެ، 1 މެޗު އެއްވަރު ކޮށްގެން 3.5 ޕޮއިންޓް ހޯދައިދީފައި ވާއިރު، މި ކާމިޔާބީއާއެކު ރާއްޖޭގެ އަންހެން ޗެސް ޓީމު ވަނީ ދުނިޔޭގެ ރޭންކިންގައި 53 ދަރަޖައިގެ ކުރިއެރުމެއް ހޯދައިފަ އެވެ.

މުބާރާތް ފެށިއިރު 159 ވަނައިގައި އޮތް ރާއްޖޭގެ ޓީމު މިހާރު ވަނީ ދުނިޔޭގެ 106 ވަނައަށް ޖެހިލައިފަ އެވެ.

މި މުބާރާތުގެ އަންހެން ބައިން މުޅި މުބާރާތުން އެއްވަނަ ޗައިނާ ހޯދިއިރު، ދެވަނަ ލިބުނީ ކަޒަކިސްތާނަށެވެ. އަދި ތިންވަނަ ހޯދާފައިވަނީ އިންޑިއާ އެވެ.