އެމްޑީޕީގެ ޤައުމީ މަޖިލީހުގެ އިންތިޚާބު އަންނަ ނޮވެމްބަރު މަހު ބާއްވަނީ

އިދިކޮޅު އެމްޑީޕީގެ ޤައުމީ މަޖިލީހަށް މެމްބަރުން އިންތިޚާބު ކުރުމަށް ބާއްވާ އިންތިޚާބު، އަންނަ ނޮވެމްބަރު މަހުގެ 27 ވަނަ ދުވަހު ބާއްވަން އެ ޕާޓީ އިން ނިންމައިފި އެވެ.

އެމްޑީޕީގެ ކޮންގްރެސް ނިންމުމަށް ހޮނިހިރު ދުވަހުގެ ރޭ މާލެ ސިޓީ ހޯލުގައި ބޭއްވި ރަސްމިއްޔާތުގައި އެކަން އިއުލާންކޮށްފައި ވަނީ އެ ޕާޓީގެ ޗެއާޕާސަން، ރައީސް މުޙައްމަދު ނަޝީދު އެވެ. ނަމަވެސް، އެކަމާ ގުޅޭ އިތުރު އެއްވެސް ތަފްސީލެއް ހާމަކޮށްފައި ނުވެ އެވެ.

އެންމެ ފަހުން އެމްޑީޕީގެ ޤައުމީ މަޖިލީހުގެ އިންތިޚާބު ބާއްވާފައި ވަނީ 2021 ވަނަ އަހަރުގެ ސެޕްޓެމްބަރު މަހުގެ ތެރޭގައި އެވެ. އެފަހަރުގެ އިންތިޚާބުގައި ވޯޓުލާފައި ވަނީ 50 އިންސައްތަ މެމްބަރުންނެވެ. އެ އިންތިޚާބުގައި ވޯޓު ދިނުމުގެ ޙައްގު 93،612 މެމްބަރުންނަށް ލިބުނު ނަމަވެސް، ވޯޓު ލާފައި ވަނީ 47،100 މެމްބަރުންނެވެ.

އެމްޑީޕީގެ ޤައުމީ މަޖިލީހަކީ ފަސް އަހަރުގެ މުއްދަތަކަށް އިންތިޚާބުކުރާ، އެ ޕާޓީގެ އެންމެ މުހިންމު އެއް ގުނަވަނެވެ. އެމްޑީޕީގެ މުހިންމު ކަންކަން ނިންމައި، މުހިންމު ހުށަހެޅުންތަކާ ގުޅޭ ގޮތުން އެ ޕާޓީގެ ޤައުމީ މަޖިލީހުގައި ބަހުސް ކުރެ އެވެ. 2021 ވަނަ އަހަރު އިންތިޚާބު ކުރި ޤައުމީ މަޖިލީހުގެ ދައުރު ހަމަވި ނަމަވެސް، އެމްޑީޕީ އިން ވަނީ ޤައުމީ މަޖިލީހުގެ ދައުރު ދިގުކޮށްފައި އެވެ.

އެމްޑީޕީގެ ޤައުމީ މަޖިލީހުގެ އިންތިޚާބު ނޮވެމްބަރު މަހު ބާއްވަން ނިންމާފައިވާއިރު، އެ ޕާޓީ އިން ވަނީ މި މަހުގެ 1 އިން 3 އަށް އެ ޕާޓީގެ ކޮންގްރެސް ބާއްވައިފަ އެވެ.