ނޭޕާލް މި އަހަރުގެ ސާފް ޗެމްޕިއަންޝިޕުން ނުފެންނާނެ

އަންނަ ނޮވެމްބަރު 4-17 އަށް ބަންގްލަދޭޝްގައި ބާއްވާ 15 ވަނަ ސާފް ޗެމްޕިއަންޝިޕްގައި ވާދަކުރުމަށް ސާފުން ނޭޕާލަށް ދިން ސެޕްޓެމްބަރު 30 ގެ ސުންގަޑި ހަމަވިއިރުވެސް ފީފާގެ ސަސްޕެންޝަން އުވާނުލުމުން، މުބާރާތުގެ 33 އަހަރުވީ ތާރީހުގައި ފުރަތަމަ ފަހަރަށް ނޭޕާލަށް ސާފް މުބާރާތް ގެއްލިއްޖެ އެވެ.

ނޭޕާލް ފުޓްބޯޅަ އެސޯސިއޭޝަނަށް ތިންވަނަ ފަރާތެއްގެ ނުފޫޒު ފޯރާފައިވާތީ ފީފާއިން އެގައުމު ސަސްޕެންޑްކުރީ މިދިޔަ ޖޫން މަހުގެ 24 ގަ އެވެ.

މުބާރާތުގެ ގްރޫޕްތައް:

• ގްރޫޕް އޭ: ބަންގްލަދޭޝް (ހޯސްޓް)، ސްރީލަންކާ، ބޫޓާން

• ގްރޫޕް ބީ: އިންޑިއާ، ޕާކިސްތާން، ދިވެހިރާއްޖެ

ފީފާއިން ނޭޕާލްގެ ސަސްޕެންޝަން އުވާލިނަމަ ހިމެނޭނީ ގުރޫޕް އޭގަ އެވެ.

މީގެ ކުރިން ބޭއްވި 14 މުބާރާތުގައިވެސް ވާދަކޮށްފައިވާ ނޭޕާލަށް މިއީ އެގައުމުގެ ކުޅުންތެރިންނަށް ބައިނަލްއަގުވާމީ ފެންވަރުގައި ހުނަރު ދައްކާލަން ލިބުނު ބޮޑު ފުރުސަތެއް ގެއްލިގެން ދިޔަ ކަމެކެވެ.

ދިވެހިރާއްޖޭގައި 2021 ވަނަ އަހަރު ބޭއްވި މުބާރާތުގައި ވަރުގަދަ އިންޑިއާއަށް ވުރެ ބޮޑު ތުރެޓަކަށް ވީ ނޭޕާލެވެ. އެ އަހަރު ހައިރާން ކުރަނިވި ނަތީޖާތަކެއް ހޯދައިގެން ނޭޕާލް ވަނީ ތާރީހުގައި ފުރަތަމަ ފަހަރަށް ފައިނަލްގައި ވެސް ކުޅެފަ އެވެ.

ސަސްޕެންޝަން އުވާލެވޭނެ ދުވަހެއް ނޭނގޭތީ، ނޭޕާލްގެ ކުޅިވަރާ ބެހޭ ވުޒާރާއިން މިހާރު އަންނަނީ އެ ގައުމުގެ ޑޮމެސްޓިކް ލީގު ކުރިއަށް ގެންދިއުމަށް ތައްޔާރުވަމުންނެވެ.